Жаңалық

Жылыжайда не өсіріледі?

Жаңаөзен қаласы және оған іргелес ауылдардағы жылыжайлардың қазіргі жағдайы туралы Жаңаөзен қалалық кәсіпкерлік және ауыл шаруашылығы бөлімінің басшысы Жібек Бекова хабарлады.

Жаңаөзен қаласы мен оған іргелес орналасқан елді мекендерде 8 кәсіпкер 2 гектар аумақты қамтитын жылыжай шаруашылығымен айналысып отыр. Жаңаөзен қалалық кәсіпкерлік және ауыл шаруашылығы бөлімі басшысының айтуынша биыл 0,7 гектарды құрайтын жылыжай іске қосылған.

«Жылыжайларда қияр, қызанақтар және бір жылыжайда құлпынай жемісі өсірілуде. 2020 жылы жоспар бойынша 200 тонна өнім алу күтіліп отыр. Кәсіпкерлеріміз алдағы уақытта шығарылатын өнімдерді жергілікті көтерме саудагерлерге және Ақтау қаласына өткізуді жоспарлайды. Елімізде жылыжай шаурашылығын дамытуға қолдау бар. Мысалы, жаңа үлгіде автоматтандырылған жылыжай үшін оның құрылысына кеткен шығынның 25%-ы бюджеттен субсидияланады. Мұндай үлгідегі жылыжай Жаңаөзен қаласында жоқ. Алайда, шаруа қожалықтарына ұсыныстар берілуде. Олар өз кезегінде қызығушылық танытып, алдағы уақытта жылыжай санын көбейту барысында жүзеге асыруды жоспарлауда. Осындай жаңа үлгідегі автоматтандырылған жылыжайлар Жаңаөзен қаласында алдағы 5 жылда пайда болады», – деді Жібек Бекова.

Жылыжай шаруашылығын қолдаудың тағы бір түрі – егінді суаруға кеткен судың шығынын 85%-ын субсидиялау. Мұнда тек суаруға пайдаланатын судың лимиті бекітілген желілерін ғана алу қажет. Жаңаөзен қалалық кәсіпкерлік және ауыл шаруашылығы бөлімінің басшысы Жібек Бекова бұл бағыт бойынша шаруа қожалықтары жыл сайын суға кеткен шығынының 85%-ын қайтарып, қолдау көріп отырғанын айтып, алдағы тың жоспарларымен де бөлісті.

«Қазіргі таңда қала және оған іргелес елді мекендерде жылыжай саны көбейіп келеді. Алайда, олардың көбі тұрғылықты үйінің ауласынан немесе кәсіпкерлік мақсатында алынған жерлерде айналысуда. Олар үкімет тарапынан берілетін субсидиядан қапы қалып отыр. Осындай жағдайларды ескере отырып, жергілікті кәсіпкерлердің жылыжай жобасы бойынша көптеген ұсыныстар келуіне байланысты, қала маңынан «Аграрлық аймақ» құрып, жылыжай кешендерін бір жерге шоғырландыру жоспарланып отыр. Ол үшін қазір қала маңынан жер таңдау жұмыстары жүргізіліп жатыр. Аграрлық аймақ құрылып, онда жылыжайлар орналасса, жергілікті нарықты толық қамтып өзге аудандар мен облыстарға өнім тасымалдауға қауқарлы болады», – деді Жаңаөзен қалалық кәсіпкерлік және ауыл шаруашылығы бөлімінің басшысы Жібек Бекова.

Басқа материалдар

Back to top button