Жаңалық

Халықаралық байқаудың жеңімпаздары жарияланды

«ТМД-ның мәдени астанасы» жылы аясында «Шымкент – қайырымды қала» балалар шығармашылығына арналған онлайн-фестиваль өз мәресіне жетті.

Достастық елдері арасында өткен шараға 6 жастан 15 жасқа дейінгі жалпы саны 500-ге жуық бала қатысты. Оның ішінде ТМД елдерінен 20 бала, Қазақстан Республикасынан 479 қатысушы үш номинация бойынша өз шығармаларын жолдады. Фестивалдің бағдарламасы «Вокалдық шығармашылық», «Аспапта орындау», «Бейнелеу өнері» номинациялары бойынша жүргізілді.

Балалар шығармашылығына арналған онлайн-фестивальдің барлық қатысушыларына қала әкімінің атынан арнайы дипломдар табысталды.

Фестиваль аясында Ресей, Өзбекстан, Қырғызстан елдерінің өнерлі балалары ерекше белсенділік танытты. Солардың қатарында вокал бойынша Сочи қаласынан қатысқан «Voc time» квартеті және Насибуллина Дамира, Қырғызстаннан Жанибекова Сауле өз ұлтының халық әндерін жоғары дәрежеде орындады. Өзбекстандық Султанова Шахзода, Абдурахманова Диёра, Мирпулатов Мирза-Шухрат, Миржалилова Мадина есімді суретші жастар «Бейнелеу өнері» номинациясы бойынша «Достастық елдері» тақырыбында жаңа туындыларымен фестивальдің жандануына атсалысты.

Қазақстандық жас өнерпаздар да үш номинация бойынша тақырыпты кеңінен аша білді. Атап айтқанда: «Бейнелеу өнері» номинациясында Қызылорда облысынан Зұлқарнай Нұрай, Қостанай облысынан Бейсембаева Риза, Ковалева Ирина, Трефилова Мария «Достастық елдері» тақырыбы мен Шымкент қаласының көрікті жерлерін қылқаламмен әсем бейнелеген. Жас өнер иелерінің ішінде ерекше көзге түскен Исабекова Гульназ достастық тақырыбын қабырғаға салған арнайы граффити өнерімен тәнті етті.

«Вокалдық шығармашылық» номинациясында Қостанай облысынан Перевозкина Дарья «Қазағымсың» әнін жанды дауыста әсерлі шырқаса, Павлодар облысы, Ақсу қаласының жас әншілері Арынова Дария, Сапаргалиева Азалия және Шымкент қаласынан Абуталип Алижан шетелдік классикалық шығарманы кәсіби деңгейде орындай білді.

«Аспаптық орындау» номинациясы бойынша Шығыс Қазақстан облысы, Семей қаласынан «Домбыра думан», «Қыздар ай» ансамбльдері қазақ күйлерін орындады. Маңғыстау облысы, Маңғыстау ауданының қатысушылары Әлібаева Ақторғын мен Нұртілек Жайнар да орындау шеберліктері жоғары екенін көрсете білді. Дарынды жастар қазақтың көне шығармалырын домбыра, баян, қобыз, скрипка, пианино, саксафон және гитарада еркін ойнады.

Онлайн оқуға қатысушы өнерлі балалардың сапалы бейнежазбалары әлеуметтік желіде арнайы хэштегтер арқылы жарияланып көрерменнің ыстық ықыласы мен лебізіне бөленді.

Басқа материалдар

Яндекс.Метрика
Back to top button