Білім және ғылым министрлігіне қарасты ADAL BILIM платформасында Нұр-Сұлтан қаласындағы мектептердің білім сапасы талқыланды.
Елордада 2010 жылы 74 мың оқушы болса, қазір оқушылар саны 193 мыңға жетіпті. Алайда мектеп саны сәйкесінше 2,5 есеге көбеймеген. Нәтижесінде бүгінгі күннің өзекті проблемасы – үш ауысымда оқу мәселесі туындап отыр дейді Нұр-Сұлтан қаласы №51 мектеп-гимназиясының директоры Аятжан Ахметжанұлы.
«Статистика барлық мәселені ашық көрсете алады. Елордада 90 мемлекеттік мектеп бар. Оның 10-15%-ында ғана 1200 бала оқып жатыр. Қалғандарында оқушы саны нормадан артық. Мұндай жағдайда сапалы білім қайдан болсын?!», – дейді Аятжан Ахметжанұлы.
Орта білім сапасы мемлекет пен қоғамның табысты дамуының кепілі екенін айқындай келе, KAZGUU Университеті Басқарма төрағасы Талғат Нәрікбаев мектеп санын арттыру білім сапасы мәселесін шешпейді деген пікір білдірді.
«Нұр-Сұлтан қаласында мектептер жақсы қарқынмен салынып жатыр. Бірақ алдымен мектеп санына емес, сапасына мән беруіміз керек. Біздің елде бірдеңенің сапасы жайлы әңгіме болса, бірден құрылыс бастау жайлы шешім шығады. Алдымен ол мектептің мұғалімдері мен директорының білімін қадағалап, айлығын көтеру керек. Қасым-Жомарт Кемелұлының мұғалімдердің жалақысын көтеру туралы шешімін барлығымыз қолдадық, бірақ мектеп басшыларының жалақысы өзгерген жоқ. Олардың жалақысы 150 мыңның көлемінде, ал қарамағындағы мұғалім 200-220 мың айлық алады. Жемқорлық осы тұста пайда болады», – деді Талғат Нәрікбаев.
Осы тұрғыда тікелей эфир модераторы Ерболат Мұхамеджанның «Елордалық мектеп директорларының жалақысын көтерудің қандай жолдары бар?» деген сұрағына Нұрмұхамед Досыбаев жауап берді.
«Әкімдік директорлардың жалақысын көтеру үшін мектептер «Мемлекеттік мекеме» емес, «Құқықтық мемлекеттік кәсіпорын» санатына өтуі керек. Егер мектеп шаруашылық жүргізу құқығындағы мемлекеттік кәсіпорын ретінде тіркелсе, директорларға үстемеақылар мен қосымша ақыларды өз бетінше белгілеуге құқылы», – дейді Astana Garden School мектебінің негізін қалаушы Нұрмұхамед Досыбаев.
