Адам есімін есте сақтағыңыз келсе…
Қазір жаңа технология дамыған заман, адамға арналған көмекші құрал көп. Ал, олар миға түсетін салмақты әлдеқайда жеңілдетті. Есесіне осының барлығы адамның есте сақтау қабілетін нашарлатты. Адамдардың әсіресе, жаңа таныстардың есімдерін есте сақтау тікелей адамның жадына байланысты болғанымен, өмірде сан түрлі адамдар болады. Бірі көргеннен бәрін есінде жақсы ұстаса, енді бірі адам есімін, түр келбетін есте сақтай алмайды.
Есте сақтау қабілетін дамыту адамның бойындағы басқа да қабілеттердің дамуына жол ашады. Мәселен, есте сақтау қабілеті жақсы жұмыс істейтін адамдардың елестету қабілеті мен фантазиясы басқалардан әлдеқайда алда болады. Сонымен қатар, кез келген мәселені шешуде шығармашылық көзқараспен қарайды.
Адам есімін есте сақтау үшін:
1. Ең алғаш танысқан адамыңыздың есімін іштей бірнеше рет қайталаңыз. Тіпті есімінің қалай жазылатынын сұрасаңызда болады немесе «Танысқаныма қуаныштымын …» деп есімін қосып айтсаңыз болады.
2. Жаңа ғана естіген есімді белгілі бір визуалды образбен байланыстырған жөн. Мәселен, есімінің айтылуындағы ерекшелік немесе сырт келбетіндегі ерекшелікті ескеріңіз.
3. Есімге сәйкес келетін образ құрастырыңыз. Мәселен, жаңа танысыңыздың есімі Қарлығаш болса оны қарлығаш құсымен немесе тағы бір детальдармен байланыстырып образ жасауға болады немесе ескі таныстықтардың арасында осымен аттас кісіні еске түсіріңіз.
4. Алғашқы таныстықта екінші тараптың әрбір сөзін мұқият тыңдап үйреніңіз. Себебі, адамдар өздерінің ойлары мен мәселелері (проблемалары) есебінен көп нәрсені есте сақтай бермейді. Сол себепті жаңа танысыңыз өзін таныстырып немесе өзі туралы айтып жатқанда өзіңіздің не айтатыныңызды ойламай, мұқият тыңдап, әрбір сөзін есте сақтай біліңіз.
5. Жаңа ақпаратты тағы да бір ой елегінен өткізіңіз. Яғни, аздаған уақыт өткен соң жаңа танысқан адамның есімін, оның қандай жұмыспен айналысатыны жөніндегі ақпаратты еске түсіріңіз.
