Астанада Шәмші Қалдаяқов әндерінің халықаралық фестивалі өтті
«Арыс жағасында», «Ақ бантик», «Қуаныш вальсі» бұл әндер Шәмші Қалдаяқовтың әндерін тыңдап өскен ұрпақтың жадында мәңгілік орын алған, қазақ мәдениетінің асыл мұрасына айналған шығармалар. Дәл осы туындылар «Менің Қазақстаным» атты Шәмші Қалдаяқов әндерінің халықаралық фестивалінде шырқалды, деп хабарлайды Ruh.kz.
Фестиваль қатысушылары қатарында Әзербайжан Республикасының еңбек сіңірген әртісі Ильхам Назаров, Қырғыз Республикасының еңбек сіңірген әртісі Айзирек Момунова, Алишер Навои атындағы мемлекеттік академиялық Үлкен опера және балет театрының солистері Носир Юсупов пен Феруза Юсупова, сондай-ақ Әзербайжан мемлекеттік академиялық опера және балет театрының солисі Аташ Гараев өнер көрсетті.
Кеш қонақтары жеке орындаулардан бөлек Қазақконцерттің «Astana Musical» театры, «G-band», «Астана сазы» қазақ мемлекеттік фольклорлық ансамблі және Қазақ мемлекеттік симфониялық оркестрінің керемет коллаборацияларын тамашалап қайтты.
