Павлодар облысында 17 мыңға жуық оқушы қашықтықтан «Camp time» лагеріне қатысты
Жобаны М. Катаев атындағы оқушылар сарайының әдіскерлері құрастырған, деп хабарлайды Рavlodarnews.kz.
– Лагерь өз жұмысын 15 маусымнан бастады және 10 тамызда аяқталады, – дейді оқушылар сарайының әдіскері Әсем Айыпова. – Екі айдың ішінде оқушылар түрлі бағытта дене шынықтыру бойынша өңірлік оқу-практикалық орталығы, балалар көркемсурет мектептері, «Қайнар» ОДК, «Ақсу» балалар эко-техно орталығы, балалар-жасөспірімдер экология және туризм орталығы сияқты қосымша білім беру ұйымдарымен бірлесіп ұйымдастырылған шараларға қатысты.
Лагерь жұмысы жеті тақырыптық мектепте өтті. Онлайн-режимде қызығушылықтар бойынша сабақтар, тренингтер, мерекелер, қарым-қатынас сағаттары, экскурсиялар, көрмелер, шығармашылық кездесулер, концерттер, конкурстар, викториналар, жарыстар, зияткерлік және спорттық ойындар, челлендждер, акциялар өткізілді.
«WOW-шоу» шығармашылық мектебінде шығармашылық іс-шаралар фестивалі өтті. Оған «Қазақстандық ертегі кейіпкерлері», ең үздік авторлық, театрландырылған костюмді анықтайтын «Жазғы карнавал», отбасылық онлайн «Караоке-батл» ойын сабақтары кірді.
«Техно-LAB» техно-мектебінде «Интерактивті анимациялар және шағын ойындар» бағдарламалау курсы, «Таңғажайып астрономия» танымдық сабақтары, «Техно-ВООМ» шығармашылық шеберханасында – автобустар мен кемелерді модельдеу ұйымдастырылды.
«Шығармашылық идеялар әлемі» зертханасында және «ArtMagig» және «Арт – Пикассо» жас суретші мектебінде қызықты сабақтар ұйымдастырылды.
– Лагерьге облыстың кез келген оқушысы қатысады, – дейді Әсем Айыпова. – Қатысушылар өздерінің фото және видео материалдарын әлеуметтік желілерде хэштег астында көрсетеді. Жазғы кезең аяқталғаннан кейін лагерьдің әр мектебі өзінің қызмет бағыты бойынша онлайн мектеп, арт-мектеп, онлайн жинақ, дайджест немесе онлайн фестиваль, интерактивті батл, спорттық челлендж өткізеді. Екі ай ішінде лагерь жұмысына облыстың 16819 оқушысы қатысты, әлеуметтік желілерде фото және видео материалдар 18013 қаралым жинады.
А.Бекжанқызы
