Астанадағы Mega Silk Way сауда-сауық орталығында Explore Jana Qazaqstan фотокөрмесінің ашылу рәсімі өтті. Бұл көрме Explore Jana Qazaqstan командасының National Geographic Qazaqstan редакциясымен бірлесіп, биылғы мамыр мен қыркүйек аралығында ұйымдастырған 5 экспедициясының нәтижесінде дайындалған, деп хабарлайды Ruh.kz.
Экспедиция мақсаты Қазақстанның туристік өңірлерінің әлеуетін ең үздік отандық фотографтар мен саяхатшы блогерлердің фотоаппараттары мен видеокамераларының обьективі арқылы паш етіп, ішкі туризмді дамытуға қосымша серпін беруді көздеді. Соған орай, команда мүшелері еліміздің Түркістан, Алматы, сондай-ақ шығыс пен батыс өңірлерінде болып, байтақ Отанымыздың алуан айшықты тұмса табиғатымен танысты.
National Geographic Qazaqsan редакциясы осы сапарлар барысында түсірілген 2500-ден астам фотосуреттің ішінен Honor 200 pro телефонымен айшықталған ең үздік 15 суретті іріктеп, көрмеде көпшіліктің назарына ұсынды.
Көрменің ашылу рәсімінде сондай-ақ келушілер арасында ұлан-ғайыр жеріміздің тамаша табиғаты мен көрікті жерлерін қаншалық білетіндігіне арналған арнайы сұрақ-жауап ойыны өткізіліп, жеңімпаздарға бағалы сыйлықтар тапсырылды.
