Өнер сүйер қауым үшін «Astana Musical» мемлекеттік театры «COVID-19» атты жаңа туындыны ұсынады деп хабарлайды Ruh.kz порталы ҚР Мәдениет және спорт министрлігінің баспасөз қызметіне сілтеме жасап.
Спектакльдің атауы айтып тұрғандай, қойылымдағы оқиға 2020 жылдың өзекті мәселесі «COVID-19» вирусы төңірегінде өрбиді. Мұнда ойдан шығарылған кейіпкерлер мен үйреншікті пафосқа толы образдар жоқ. Туынды толығымен өміріміздің қазіргі болмысын көрсететін шынайы оқиғаларға негізделген.
««COVID-19» хореографиялық спектаклі – бұл мәңгілік құндылықтар туралы пайымдаулар, адамдардың карантин кезіндегі ішкі ой-толғанысы, санамыздағы өзгерістер, көпшіліктің қисынсыз әрекеттері мен ойға қонымсыз түсініктері, індет кесірінен жақындарынан айырылған азаматтардың қайғы-қасіреті…
Әлемді күрт өзгерткен COVID-19» пандемиясы бізді өзгерте алды ма? Сақтық шаралары мен шектеулерге дейінгі өмір қайта орала ма? Осы және өзге де өзекті сауалдардың жауабын көрермендер «COVID-19» атты хореографиялық спектакльден табады», – делінген баспасөз хабарламасында.
Спектакльдің режиссер-хореографы – «Astana Musical» театрының әртісі Анель Мырзағұлова, музыкалық туындылардың авторы – «Astana Musical» әртісі Ақжол Өмірзақов.
Жаңа қойылым 26-27 ақпанда елордадағы «Қазақстан» ОКЗ-да сахналанатын болады. Басталуы: сағат 19:30-да.
