Аты аңызға айналған «GULDER»» ансамблінің жеке концерті өтті
Қазанның 18-ші жұлдызында Роза Бағланова атындағы «Қазақконцерт» мемлекеттік академиялық концерттік ұйымының 64-ші концерттік маусымы аясында «GULDER» ансамблінің концерті өтті, деп хабарлайды Ruh.kz.
«GULDER» ансамблі – «G-band», балет және эстрада солистерін біріктірген Қазақстанның ең танымал және тарихы терең ансамблі.
Концерт «Қазақконцерт» жұлдыздары – «Дарын» мемлекеттік жастар сыйлығының лауреаты Әлібек Әлмадиев, республикалық және халықаралық конкурстардың лауреаттары Салтанат Меңдіғалиева, Дидар Әбдіхалық, Ербол Тәжібаев, Анна Уварова және Ақбөпе Әлібекованың қатысуымен өтті.
Ұжым көпшілікті қазақтың әндері мен дәстүрлі билері, сондай-ақ заманауи музыка мен эстрадалық нөмірлерді ұтымды үйлестіре отырып, жаңа әрі әсерлі би қойылымдарымен тәнті етті. «GULDER» ұсынған би қойылымдары - бұл қазақ даласының бай мәдениеті мен тарихын айшықтайтын, ұлттық дәстүр мен заманауи өнерді бір арнаға тоғыстырған ерекше туындылар.
Өнерпаздардың әр қимылы мен әр әуені - көрерменнің жүрегіне жететін, сезімнің тереңінен сыр шертер шынайы өнер. Ансамбль «Қуаныш думан», «Ақ дариға», «Құстар әні» секілді жаңа хореографиялық композицияларын ұсынды. Концерттік бағдарламадағы әрбір туынды көрермендердің ыстық ықыласына ие болып, ұмытылмас әсер сыйлады.
Айта кету керек, 2023 жылдың көктемінде «GULDER» ансамблінің жаңартылған құрамының тұсаукесері өтті. Ансамбльдің көркемдік жетекшісі - Абзал Өсімбаев, бас балетмейстері - Анвара Садықова.
