29 Қыркүйек, 2020
«Жаңа гуманитарлық білім. Қазақ тіліндегі 100 жаңа оқулық» – прагматизм мен сананың ашықтығына апарар жол» тақырыбы аясында баспасөз туры өтті

Бүгін сағат 15:00-де ZOOM конференция арқылы «Жаңа гуманитарлық білім. Қазақ тіліндегі 100 жаңа оқулық» – прагматизм мен сананың ашықтығына апарар жол» тақырыбы аясында баспасөз туры өтті. 

Баспасөз турына ҚР Ақпарат және қоғамдық даму министрлігі «Рухани жаңғыру» департаментінің директоры Нұрлан Күнтуов, «Ұлттық аударма бюросы» ҚҚ атқарушы директоры Рауан Кенжеханұлы, «Мазмұндама» қоғамдық қорының жетекшісі Шыңғыс Мұқан, Л. Гумилев атындағы ЕҰУ проректоры Дихан Қамзабекұлы, Филология ғылымдарының докторы, профессор, ҚР ҰҒА корреспондент-мүшесі Шерубай Құрманбайұлы қатысты.

Рауан Кенжеханұлы, «Ұлттық аударма бюросы» ҚҚ атқарушы директоры:

«Бүгінде жобаның соңғы кезеңі жүріп жатыр. Осы орайда әлемдік деңгейдегі 23 оқулық қазақ тіліне аударылуда. Айта кетейік, бұған дейін бізге неліктен тек батыстың кітаптарына басымдылық беріледі деген сияқты сын айтылды. Сондықтан соңғы оқулықтардың көпшілігі Шығыс кітаптары болмақ. Ал жалпы жоба осы жылдың желтоқсан айында аяқталуы тиіс. Әлбетте, кітаптарға деген сұраныс өте жоғары. Барлық студенттерге жетпейтіні белгілі. Соған байланысты, барша қауымға қолжетімді болуы үшін оқулықтардың электронды нұсқалары OpenU.kz Қазақстанның ашық университеті платформасы мен Kitap.kz порталдарына орналастырылды».

«Рухани жаңғыру» бағдарламасының «Жаңа гуманитарлық білім. Қазақ тіліндегі 100 жаңа оқулық» жобасы аясында үш жылдың ішінде әлемнің әр тілдерінен үздік 77 оқулық қазақ тіліне аударылып, еліміздегі 132 университетке жеткізілді. Жаңа оқулықтар 2018-2019 оқу жылынан бастап жоғары білім беру жүйесіне енгізілді. Қазір жобаның төртінші кезеңіне таңдалған 23 оқулықты аудару процесі жүргізілуде.

Айта кетейік, баспасөз туры Ruh.kz порталының Facebook парақшасынан тікелей эфирге шығарылды.

Аружан Мырзатай
Ruh.kz