6 Қыркүйек, 2017
Абайдың әдеби мұрасы – жастарды тәрбиелеудің құралы

Елбасы кітапханасы «Абай оқулары» атты әлеуметтік желілердегі жыл сайынғы әдебиет сайысының нәтижелерін қорытындылады. Еліміздің түрлі аймақтарынан қолдау тапқан жоба Мемлекет басшысының «Рухани жаңғыру» бағдарламасы аясында ұйымдастырылды, деп хабарлайды Baq.kz ақпарат агенттігінің тілшісі.


– Мемлекет басшысы Н.Ә. Назарбаев: «Абай сөзі – қазақтың бойтұмары. Абай мұрасы – қазақтың ең қасиетті қазынасы», - дейді. Қоғамдық сананы жаңғырту бағдарламасын қолдау жолында Елбасы кітапханасы Абай мұрасын жастар арасында дәріптеу және олардың әдеби талғамын қалыптастыру, оқу мәдениетін ілгерілету мәселесін мықтап қолға алды. Осы орайда «Абай оқулары» ел азаматтарының бойындағы ұлттық рухты көтеріп, отансүйгіштік қасиеттер мен әлеуметтік, азаматтық жауапкершілікті арттыруға бағытталды, – деді Елбасы кітапханасы директорының бірінші орынбасары Әмірхан Рахымжанов.



Белгілі абайтанушы, Қазақстан Жазушылар одағының мүшесі Алмахан Мұхаметқалиқызының сөзінше, Абай шығармашылығын бүгінгі ұрпаққа жан-жақты насихаттаудың маңызы зор. Оның айтуынша, Абайдың әдеби мұрасын кеңінен насихаттау – жастарды тәрбиелеудің, ұлттың тілі мен ділін оятудың бірден бір құралы. Іс-шара барысында «EXPO&WOMEN» халықаралық ұйымының атқарушы директоры Ләззат Асқарова өз баяндамасын оқыды.



Сайыс қорытындысы бойынша бірінші орынды Алматы облысы Қаскелең қаласындағы «Аяжан Қарасай» медициналық колледжінің түлегі Салтанат Өтебай қанжығасына байлады. 2-дәрежелі дипломмен Астана қаласы Қазақ ұлттық өнер университетінің 2-курс студенті Рауан Әбдуали марапатталды. 3-орынды Солтүстік Қазақстан облысы Ақбұлақ ауылындағы Чехов орта мектебінің 11-сынып оқушысы Виктория Вьюшкина мен Алматы облысы Қарасай ауданы Үшқоңыр ауылындағы орта мектеп-гимназиясының 8-сынып оқушысы Бағила Ниетуллаева алды. Алматы облысы, Жамбыл ауданы Қайназар орта мектебінің оқушылары, апалы-сіңлілі Дариябай Әсел мен Аружан ынталандыру сыйлығы мен «ең жас қатысушы» номинациясын иеленді. Ал Ноттингем университетінің 2-курс студенті Жанбота Дүйсебаева «Абай мұрасын әлемдік кеңістікте дәріптеу» номинациясының жүлдегері атанды. Оларға тың кітап топтамалары мен бірегей естелік сыйлықтары тарту етілді.



Шара барысында көпшілік назарына ұсынылған кітап көрмесіне кітапхана қоры мен Елбасының жеке кітапханасындағы бірегей басылымдар қойылды. Қонақтар Абай туындылары алғашқы аудармаларының түпнұсқаларымен танысты.



Естеріңізге салсақ, «Абай оқулары» атты жыл сайынғы әдебиет сайысы ұлтымыздың ұлы ақыны, дана ойшылы, қазақ жазба әдебиетінің негізін қалаушысы және тұңғыш классигі Абай Құнанбайұлының туған күніне орай өткізілген болатын. Оған қатысқан жұмыстармен Instagram, Facebook әлеуметтік желілерінде #біздіңАбай #Абайәдебиетсайысы #ЕлбасыкітапханасыАбай хэштегтерінің көмегімен танысуға болады.