«ShymQala» этноауылы ашылды

Салтанатты іс-шараға қала әкімі Мұрат Әйтенов пен әкімнің орынбасарлары, аудан әкімдері, қалалық мәслихаттың депутаттары, Қазақстан халқы Ассамблеясы аясындағы этномәдени бірлестіктердің жетекшілері, зиялы қауым өкілдері қатысты.

Шараға жиылған қауым Қазақстан халқының бірлігі мен ынтымақтастығы құрметіне Тәуелсіздік саябағына 70 көшет отырғызды.

Қала әкімі бастаған топ ұлттық аспаптар, қолөнер бұйымдары, кілем-тоқыма бұйымдары шеберлеріне бөлінген киіз үйлерге бас сұғып, шеберлердің жұмыстарымен танысты.

Этноауылда бұған қоса алып тайқазан, киіз үй үлгісіндегі концерт залы, қолөнершілер ауылы, балалар алаңшасы орналасқан.

Этноауылдың алғашқы қонақтары садақ ату алаңшасында жебе атып, туристік орталықтың жұмысымен танысты.

«Баршаңызды бүгінгі мерекемен құттықтаймын. Қазақстан әлемде баламасы жоқ Ассамблея құрып, дүние жүзіне үлгі болып отыр. Ал бүгінгі ашылған «ShymQala» этноауылы үшінші мегаполистің үлкен жаңалығы. Қаламызға келген қонақтарды ең алдымен осында алып келу керек. Бұл кешен Шымкенттің туризм әлеуетін жаңа белеске көтереді деп сенеміз», - деді қала әкімі Мұрат Әйтенов.

Сондай ақ, мерекелік шарада этнос өкілдері ҚР Тәуелсіздігінің 30 жылдығына 30 метрлік құрақ көрпе тарту етті.

Айта кетейік, алып кешенде екі негізгі туристік бағыт бар. Екеуі оңтүстік және шығыс қақпалардан басталады.

«Этноауылды қала тұрғындары ерте көктемнен күзге дейін, дүйсенбі мен жексенбі аралығында келіп, тамашалай алады», - дейді қалалық әдеп-ғұрып және салт-дәстүр орталығы директорының міндетін атқарушы Бейбітжан Мүслимов.