Жаңа гуманитарлық білім. Қазақ тіліндегі 100 жаңа оқулық

Жаһандану дәуірінде уақыттың барлық сын-қатерлерін қабылдайтын жаңа буын қалыптастыру аса маңызды болып табылады. Мұның басты құралы - білім беру. Әлеуметтік-гуманитарлық саладағы жетекші 100 оқулықтың аудармасы - бәсекеге қабілеттілік пен прагматизм рухында тәрбиеленген қазақстандықтардың жаңа буынын қалыптастырудағы дұрыс қадам болып табылады.

Мақсаты: студенттерге гуманитарлық білім саласында мемлекеттік тілде үздік әлемдік стандарттарға сәйкес білім алуға жағдай жасау.

Жобаны іске асыру мақсатында 2017 жылы «Ұлттық аударма бюросы» үкіметтік емес және коммерциялық емес қоғамдық қоры құрылды. Бүгінгі таңда 300-ден астам оқытушылар, ғалымдар, әдебиетшілер мен баспагерлерден тұратын жоғары білікті аудармашылар пулы құрылды. Әлемнің жетекші жоғары оқу орындарымен, ғылыми орталықтармен және баспа үйлерімен ынтымақтастық орнатылды.

2017-2019 жылдары аударылған 77 оқулық (2017 жылы 17, 2018 жылы – 30, 2019 жылы – 30 оқулық аударылды) жоғары оқу орындарының білім беру процесіне тиісті пәндерді («Философия», «Мәдениеттану», «Маркетинг», «Экономика», «Педагогика және психология», «Әлеуметтану», «Тарих», «Дінтану», «Кәсіпкерлік негіздері мен ментор-стартаптар» және т.б.) оқыту кезінде базалық пән ретінде енгізілді.

Осы жылы тағы 23 оқулық аударылды. Олар жыл соңына дейін басылып, жоғары оқу орындарына таратылады. Әрбір оқулық негізінде қазақ және орыс тілдеріндегі 50 бейнедәрістен тұратын бейнекурстар әзірленді. Аталған оқулықтар мен бейнедәрістер 100kitap.kz сайтында және www.OpenU.kz порталында орналастырылған. Порталда 107 мыңға жуық пайдаланушы тіркелген, оның серіктестері 128 жоғары оқу орны мен 147 колледжі.

ЖОО-ның білім беру бағдарламаларының мазмұнын жаңарту, оқу процесіне жаңа оқулықтарды енгізу мен оның тиімділігін одан әрі арттыру жөніндегі шараларға тексеріс жүргізілді. Барлық жоғары оқу орындар оқулықтардың  жұмыс бағдарламаларын әзірлеуде, әлеуметтік-гуманитарлық бағыттағы пәндер бойынша дәрістер оқуда. Сондай-ақ, студенттер мен ПОҚ ғылыми зерттеу кезінде жұмыстарында қолданылатындығы анықталды.

«Жаңа гуманитарлық білім. Қазақ тіліндегі 100 жаңа оқулық» жобасы бойынша жұмыс жоспарын және білім беру процесіне аударылған оқулықтарды енгізу бойынша жол картасын ЖОО жоспарлы түрде жүзеге асыруда.

Білім беру пәндері циклінің жаңартылған мазмұны мен оларды оқу процесінде пайдалану бойынша ЖОО оқытушыларына біліктілікті арттыру курстары ұйымдастырылуда.