Елбасының «Болашаққа бағдар: рухани жаңғыру» атты бағдарламалық мақаласында өз мәдениетін, ұлттық кодты сақтау жаңғырту шарттарының бірі ретінде қарастырылады.
«Ұлттық код» дегеніміз – сан ғасырлық тарихи тамырымыз, өзге елден ерекшелеп тұратын салт-дәстүр, әдет-ғұрпымыз, діни ұстанымымыз бен тіліміз, білім мен ғылымымыз, өзімізге ғана тән ұлттық болмысымыз бен құндылықтарымыз.
Салт-дәстүр – әр ұлттың, халықтың діні мен сеніміне, тұрмыс тіршілігіне, ұлттық құрылым ерекшелігіне сәйкес ғасырлар бойы жинақталып, өмірдің өзі туғызған ғұрыптардың жиынтығы, қауым мен қоғамда қалыптасқан мінез-құлықтың үлгілері.
2020 жылғы 17 тамыз күні Ертіс ауданы, Иса Байзақов ауылы «Байзақов ауылдық мәдениет үйі» бастамасымен «Отбасылық салт-дәстүр» атты онлайн іс-шара ұйымдастырылды. Мақсаты – отбасылық салт-дәстүрге деген сүйіспеншілік сезімін ояту, болашақ ұрпақты салт-дәстүрлер арқылы білімділікке, шығармашылыққа және адамгершілікке тәрбиелеу.
Іс-шараның ережесі бойынша екі отбасы белгілі бір салт-дәстүр түрі бойынша және отбасылары жайында қысқаша мағлұмат айтып, бейнеролик түсіреді. Тұсаукесер рәсімін Мухамединовтар отбасы көрсетсе, Аманжоловтар отбасы құрақ көрпелерді тігуді көрсетті. Барлық бейнероликтер әлеуметтік желідегі @baizakovskii_sdk инстаграм парақшасында жарияланды.
«Байзақов ауылдық мәдениет үйінің» мәдени-ұйымдастырушысы Айкүміс Кулахметованың айтуынша:
– Әр ұлттың өзіне сай ата дәстүрі, әдет-ғұрпы және ырымдары бар. Ол сол ұлттың жан дүниесін көрсетіп тұрады. Қазақ халқының да өзіне сай ерекшеліктерінің бейнесі секілді салт-дәстүрі бар. Олардың мән-мағынасы, берер тәрбиесі мол. Осындай шараларды жыл сайын дәстүрлі түрде өткізуді жоспарлаудамыз.
Павлодар облысы,
«Рухани жаңғыру» жобалық кеңсесі
