Адам интеллектісіне сәйкестендіріп құрылған машиналар көпшілікті қызықтыратыны сөзсіз. Қазіргі таңда әлемде 3,5 мыңнан астам компания осы жасанды интеллектіні дамытумен айналысып жатыр. Ендеше ең үздік роботтар топтамасын жариялайтын боламыз.
Samsung Bot Care
Samsung компаниясы көмекші бірнеше робот легін ұсынды. Бұл машина денсаулықты бақылау бойынша бірқатар қызметтерді ұсынады. Робот пациенттерге дәрі қабылдау уақытын еске сала алады. Егер қарт адам сүрініп, құлап кетсе, оған алғашқы жәрдем жасап, жедел жәрдем шақырады. Құрылғының кейбір функциялары дені сау адамдар үшін қызықты болуы мүмкін. Мысалы, оның ішінде ұйқыға арналған монитор бар. Сіз ұйықтап жатқанда, робот сіздің тынысыңызды тыңдап, қаншалықты демалғаныңызды талдайды.
Samsung Bot Retail
Bot Retail роботы өз әріптестеріне қарағанда ақылды. Ол мейрамханаларда, бөлшек сауда дүкендерінде және басқа да ұқсас жерлерде клиенттерге қызмет көрсетуге арналған. Жалпы алғанда, робот сатушыларды, даяшыларды және басқа қызмет көрсету персоналын толығымен ауыстыра алады.
Ubtech Walker
Ол CES 2018 көрмесінде жарыққа шықты, бірақ содан бері ол әлдеқайда жетілдірілген. Сол жылы ол жай ғана аяқтары бар дауыстық көмекші болды. Бүгін Уолкер адам кейпіне ұқсастандырылып, екі қолға ие болды. Қолдарының арқасында ол иесіне әртүрлі ұсақ заттарды алып келуді үйренді. Мысалы, Walker сізге бір стақан су алып келеді. Оның қызметі – адам бұйрықтарын орындау.
Softbank Pepper
SoftBank Robotics француз компаниясы көрмеге Pepper роботын әкелді. 2018 жылдың ақпан айынан осы робот Мюнхен әуежайында қызмет көрсетіп жүрген-ді. Терминал – 2 жолаушылары көмек сұрап, роботқа хабарласа алады. Мысалы, оған қону орнына қалай бару керек, қай мейрамханадан тамақтанған тиімді немесе белгілі бір дүкенді қалай табу керек деген сұрақтар қойылуы мүмкін. Роботты жасап шығарушы компанияның пікірінше, 120 см-ге созылған робот басқа салаларда – даяшы немесе сатушы ретінде қызмет атқара алады.
Zoetic Kiki
Zoetic Kiki жасанды интеллекттілі үй жануар-роботы. Роботтың мұрнында камера орналасқан. Камераның көмегімен ол иесінің бетін танып, оның қимыл-қозғалысын бақылайды. AI қозғалтқышы жеке тұлға қылықтарына еліктеп, адамның әрекеттеріне бейімделуге тырысады. Роботтың функциясы – адамның көңілін көтеру, достасу. Егер роботқа адам қайғылы болып көрінсе, ол иесін күлдіруге тырысады.
Азаматтығы бар робот
София – бұл Гонконгтың Hanson Robotics компаниясы жасаған әйел (гиноид) түріндегі гуманоидты робот. Британдық актриса Одри Хепберннің түріне ұқсастырып жасалған. Ол адамдардың түрі мен мінез-құлқына сәйкестендіріліп, соларға бейімделуге, адамдармен жұмыс істеуге арналған. Софиямен бүкіл әлемде көптеген кездесулер өтті. 2017 жылдың қазан айында ол Сауд Арабиясының азаматы атанып, азаматтық алған алғашқы робот болды.
Тележүргізуші робот
Қытайдың «Синьхуа» мемлекеттік жаңалықтар агенттігі Sogou.com қытайлық іздеу жүйесімен біріге отырып, әлемдегі алғашқы тележүргізуші роботты эфирге шығарды. Роботтың сыртқы көрінісі тележүргізуші Чжан Чжаодан көшірілген.
Кейіннен Ресейде Тума Урман атты робот шығарылып, тележүргізуші Анна Урманцеваның түріне сәйкестендірілді. Ол болашақта Анна Урманцеваның орнына «Мозговой штурм» телеарнасын жүргізеді деген болжам бар.
Жасанды интеллекттің айтылып өткен перспективалы әлеуетіне қарамастан, ғалымдардың роботтар туралы ойы екіге бөлінді: біреуі оның пайдасына сенімді болса, басқалары оның адамзатты жоюға қабілетті екенін ескертеді. Иә, кез-келген құбылыс өзінің пайдасы мен зиянын бірдей әкеледі. Заманауи технологияның ұсынып отырған мүмкіндіктерін дұрыс және орынды пайдаланып, адамзатқа тигізер зиянынан аулақ болып, алдын алу адамзаттың өз қолында.
