Ұлттық экономика вице-министрі Қарағанды облысындағы әлеуметтік нысандарды аралады
Өңірге жұмыс сапары барысында Бауыржан Омарбеков «Ауыл – ел бесігі» бағдарламасы аясында жүзеге асырылған жобалардың сапасын бағалады, деп хабарлайды Ruh.kz.
![ҰЭМ](/storage/storage/element/2023/11/30/mainphoto/X0QcpdUVUv07yIkeLcpLGlFaiOsrZ1niw7cFOJw6.jpg?time=1701316267)
Ол Осакаров ауданы Озерное ауылында бір ауысымда 25 адам қабылдайтын фельдшерлік-акушерлік пунктке барды. Жобаның құны 162,3 млн. теңгені құрайды. Қазіргі уақытта нысанды қабылдау жұмыстары жүргізіліп отыр.
Сондай-ақ аталмыш бағдарлама бойынша 262 млн. теңгеге жолдарды орташа жөндеу, 653 млн. теңгеге мектеп ғимаратын және 134,6 млн. теңгеге ауылдық мәдениет үйін күрделі жөндеуден өткізу жоспарланған.
Бұдан бөлек, вице-министр әкімдік ғимаратында жергілікті тұрғындармен кездесу өткізді. Шараға қатысушылар әлеуметтік нысандарды жөндеу және салу, газбен жабдықтау, жолдарды жөндеу мәселелерін көтерді.
Өз кезегінде вице-министр азаматтар көтерген барлық мәселелер мен ұсыныстар міндетті түрде қаралатынын атап өтті.
Сонымен қатар Бұқар Жырау ауданы Баймырза ауылында Б.Омарбековке «Ауыл – ел бесігі» бағдарламасы бойынша күрделі жөндеуден өткен мәдениет үйі таныстырылды.
Бағдарлама аясында ауылдың 8 көшесінде 2021 жылы 104,7 млн. теңгеге ауылішілік жолдардың орташа жөндеу жұмыстары аяқталды.
Жалпы, өткен жылы «Ауыл – ел бесігі» бағдарламасы бойынша облыстың 21 ауылында 42 жобаны (оның ішінде 22 әлеуметтік нысан, 20 ауылішілік жол) іске асыруға 3,5 млрд.теңге бөлінді. Ағымдағы жылы 3,6 млрд.теңгеге 12 жобаны іске асыру жоспарланып отыр.