«Ұлттық рухани жаңғыру» жобасының бағыттары және жүзеге асыру тетіктерін түсіндіру бойынша жиын өтті
«Рухани жаңғыру» қазақстандық қоғамдық даму институтының алаңында «Ұлттық рухани жаңғыру» ұлттық жобасын жүзеге асыру тетіктері бойынша ҚР Білім және ғылым министрлігі, Шәкен Айманов атындағы «Қазақфильм» АҚ және ҚР Ақпарат және қоғамдық даму министрлігінің өкілдерінің қатысуымен мәдениет саласының мамандарына арналған онлайн кездесу ұйымдастырылды.
«Рухани жаңғыру» ҚҚДИ жоба менеджері Қанапиянов Рүстем «Ұлттық рухани жаңғыру» жобасының басты мақсаттарына тоқталып, ҚР Президентінің № 670 Жарлығымен 10 Ұлттық жоба тізіміне енген, «Ұлттық рухани жаңғыру» ұлттық жобасының 3 бағыты, 7 міндеті, 21 көрсеткіші мен 66 іс-шарасы туралы айтып берді.
«Рухани жаңғыру» құндылықтарын ілгерілету және мемлекеттік тілді дамыту бағыты бойынша 8 көрсеткіш, 38 іс-шара жоспарланып отыр. Мәселен келесі жылдан бастап «Ulttyq tárbıe», «Кемел болашақ», «Ruh vision» жобаларын іске асыру, ұрпақтар сабақтастығын және халық дәстүрлерін танымал етуді қамтамасыз ету жөніндегі шаралар кешенін іске асыру, танымал мультипликациялық және танымдық арналарды қазақ тіліне аудару жұмыстары бойынша кешенді шаралар жиыны жоспарда»,- деді ол.
Сондай-ақ, мектеп жасындағы балаларды мәдени тәрбиемен қамту бойынша «Теңгегүл мен оның достарының бастан кешкен қиял-ғажайып оқиғалары», «Көңілді қаржылық сауаттылық сабақтары» секілді жобалардың сәтті жүзеге асқанын атаған жоба менеджері, бұл бастауыш және орта мектеп жасындағы балаларға арналған мемлекеттік және орыс тілдеріндегі кітап екеніне тоқталды.
«Кітап үш достың және Сиқырлы Монетканың Қаржы әлеміндегі бастан кешкен оқиғалары туралы баяндайды. Кітапта экономиканың құпиялары, ақшамен қалайша достасуға болатындығы және Қаржы әлемінің қыр-сыры жөнінде баяндалады. Кітаптың кейіпкерлері терминдермен, ұғымдар және анықтамалармен танысып, зерделейді, жинақтау, жеке және отбасылық бюджет туралы бастапқы білімнен біртіндеп қаржы құралдарының мағынасын ажыратып, қаржы нарығы қалай жұмыс істейтіні туралы хабардар болады. Кітаптың ұстаздарға, тәрбиешілерге, ата-аналарға көмегі зор», – дейді Рүстем Қанапиянов.
«Жаңа гуманитарлық білім. Қазақ тіліндегі 100 жаңа оқулық» жобасын жүзеге асыру бойынша атқарылған жұмыстар туралы толыққанды мәліметтер де берілді.
Жоба аясында тарих, философия, социология, психология, антропология, мәдениеттану, дінтану, лингвистика, инновация, медиа, экономика, менеджмент, кәсіпкерлік, кинотану, театртану салалары бойынша әлемнің маңдайалды университеттерінде оқытылатын үздік оқулықтар қазақ тіліне аударылған.
«Бұл жобаны іске асыру бірқатар аса маңызды мәселені шешуге жол ашады. «Біріншіден, гуманитарлық бағыт бойынша әлемнің 100 үздік оқулығы қазақ тіліне аударылды. Сол арқылы тілдің дамуына аса қажетті ғылыми мазмұн мен лексика дамиды. Екіншіден, гуманитарлық салалар бойынша оқитын студенттердің заман талабына сай білім алуына жағдай жасалады. Біздің оқу орындарындағы мазмұн және академиялық талқы деңгейі әлемнің ілгері ғылыми орталықтарының деңгейіне шығады. Үшіншіден, аса ауқымды аударма жобасы қазақстандық аударма мектебінің күшейіп, жетілуіне жағдай жасайды», – деді жоба жетекшісі.
«Рухани жаңғыру» құндылықтарын ілгерілету және мемлекеттік тілді дамыту бағыты бойынша сөз алған ҚР Білім және ғылым министрлігі, Тіл саясаты комитеті, Тіл саясатын талдау және мониторинг басқармасының бас сарапшысы Жакенов Талғат мемлекеттік тілді дамыту үшін жағдай жасау бойынша атқарылып жатқан жобалар жөнінде айтып берді.
«Қазақ тілін оқыту бойынша ІТ-өнімдерін әзірлеу, енгізу және шығару бойынша жаңа 11 IT қосымша дайындау қолға алынып отыр. Олардың ішінде әртүрлі салалық сөздіктер мен энциклопедиялардағы сөздер мен тұрақты сөз тіркестерін, қазақ тіліндегі көне сөздерді, кірме сөздерді, аймақтық және ақпараттық технологиялардың даму кезеңіндегі жаңа технологиялық сөздердің мағынасын көруге мүмкіндік беретін Sozdikqor.kz порталы, қазақ тілін өздігінен оқуға арналған веб-платформа Til-Qural порталы және де қазақ әліпбиінің жаңа нұсқасы бекітілгеннен кейін Qazlatyn.kz деген портал ашу жоспарланып отыр. Сол арқылы сіздер әліпбиге байланысты барлық сұрақтарға жауап таба аласыздар», – деді Жакенов Талғат.
Министрлік өкілі 2,5 млн көркем әдебиет қайта басылып, республиканың түкпір-түкпіріндегі кітапхана қорларына жеткізілгенін, сондай-ақ дебат қозғалысын қайта жаңғырту көзделіп жатқанын, алдағы төрт жылда 1861 дебат тренерлерін даярлау жоспарланып отырғанын да жеткізді.
«Ел Рухы» бағыты бойынша сөз алған Шәкен Айманов атындағы «Қазақфильм» АҚ Өндіріс қызметі бөлімінің басшысы Серікбаева Аруана, бұл бағыттың 5 нақты көрсеткіш пен 13 іс-шарадан тұратынына тоқталды.
«Біз «Ұлттық рухани жаңғыру» ұлттық жобасының комиссиясына 11 жоба ұсындық содан 4 жоба қабылданды. Олардың ішінде отандық анимациялық контентті шығаратын сервистік компания ретінде «Қазақанимация» шығармашылық бірлестігін құру және ескі қазақ кинематографындағы классикалық туындыларды цифрлық жүйеге көшіру жобалары бар», – деді ол.
Жиынға қатысқан барлық мәдениет саласының мамандары Ұлттық жобаның тұтастай қоғамдық сананы жаңғыртумен қатар мемлекетіміздің әлеуметтік саясаты мен халықтың хәл-ахуалына оң мультипликативті әсері болатынын айтты.
