Жаһандық стартап-экожүйесі индексінде Қазақстан көш бастап тұр
Қазақстанның стартап-экожүйесі 2023 жаһандық индексінде Орталық Азиядағы көшбасшылығын растады, деп хабарлайды Ruh.kz.
Бүкіл әлемдегі стартап-экожүйелерді талдауға маманданған StartupBlink жетекші зерттеу орталығы 2023 жылдың қорытындысын жариялады.Қазақстанның бас қаласы Астана қарқынды өсім көрсетіп, жаһандық деңгейде 25 позицияға көтеріліп, аймақтық рейтингте бірінші орынға шықты. Осы табысы үшін Astana Hub технопаркі беделді Startup Ecosystem Awards сыйлығымен марапатталды.
Астананың Орталық Азиядағы ең үздік стартап экожүйесі үшін марапаттауы аймақтың дамуындағы маңызды кезеңді білдіреді. Astana Hub инновациялар мен стартаптардың өсуіне қолайлы жағдай жасау арқылы осы жетістікте шешуші рөл атқарды. Бұл жетістік Қазақстанның Орталық Азиядағы стартап сахнасында өсіп келе жатқан ықпалы мен көшбасшылығын көрсетеді, - деді Махмод Шамси, StartupBlink бизнесті дамыту бөлімінің басшысы.
StartupBlink Startup Ecosystem Awards жеңімпаздарын анықтау 40-тан астам параметрлерді, соның ішінде популяция көлемін, аймақтық ықпалды және басқа да факторларды ескеретін күрделі алгоритмге негізделгенін атап өтеді. Бұл жүйе объективті және жан-жақты тануды қамтамасыз етіп, әртүрлі деңгейде стартаптық экожүйелердің дамуына ықпал етеді.
StartupBlink бүкіл әлем бойынша стартап-экожүйелер туралы сенімді ақпарат көзі болып отыр. Сондықтан бұл рейтингте мойындалу стартаптарды қолдау және дамытуға бағытталған күш-жігеріміздің нақты нәтиже бере бастағанын көрсетеді. Бұл жетістіктерімізге берілген жоғары баға ғана емес, әлемдік инвесторлардың назарын аудартуға да жол ашары анық. Біз жаһандық инвестициялық қауымдастықты стартап-инновациядағы көшбасшылық жолымызға қосылуға шақырамыз, - деді Қазақстан Республикасының Цифрлық даму, инновациялар және аэроғарыш өнеркәсібі министрі Бағдат Мусин.
Айта кетейік, StartupBlink – бүкіл әлем бойынша стартап-экожүйелердің динамикасын анықтауға және олардың өсуін жеделдетуге арналған стартап-экожүйе картасы және зерттеу хабы. Олардың жыл сайынғы рейтингтері мен марапаттары бүкіл әлемдегі стартаптар қауымдастығындағы әсер мен инновацияны мойындайды.
