Жаңалық

«Тренерлерге арналған тренинг» өтті

Ұлттық волонтерлік желі бағыттайтын «Birgemiz» волонтерлер Республикалық фронт-офисі волонтерлік саласындағы «Тренерлерге арналған тренинг» өткізді.

Президентіміз Қасым-Жомарт Тоқаевтың бастамасымен Қазақстанда 2020-жыл – «Еріктілер жылы» деп жарияланды. Бұл – үмітке, игі істерге толы уақыт. Жақсылыққа жаны құмар еріктілер көмекке аса мұқтаж жандарға көмек көрсетуде бар күштерін салып, бірге әрекет етті. Пандемия қарсаңында волонтерлер азаматтарымызға үлкен қолдау көрсетіп, еліміздегі қиын-қыстау кезеңде алдыңғы шепте жүріп, тірек бола алды.

«Birgemiz» волонтерлер Республикалық фронт-офисінің қызметі аясында 28 тамыз күні волонтерлік саласындағы «Тренерлерге арналған тренинг» республикалық мектебі өз бастауын алды.

Қазақстанның барлық аймағынан келген қатысушылар алдағы уақытта өз аймағындағы волонтерлерге семинарлар өткізу үшін тренинг жасау дағдыларын үйренуге мүмкіндік алды.

Талаптарға сәйкес, Қазақстанның барлық аймағынан жалпы 43 үміткер іріктелді. Барлық қатысушылар ораторлық шеберліктен бастап тренердің ішкі тұрақтылығына дейінгі түрлі дағдыларға қатысты білім алды. Сондай-ақ, бағдарламаға білім беру бағдарламаларын дайындау бойынша сабақтар, тренердің кілттік дағдыларын талқылау, аудиториямен жұмыс істеу әдістемесі мен практикалық сабақтар енгізілді. Сабақ 2 тілде (қазақ, орыс) Zoom платформасы арқылы онлайн форматта жүргізілді. Сессияға Қазақстаннан бөлек, Ресей, Өзбекстан, Қырғызстан, Беларусь Республикасы, Бельгия мен Армения елдерінен спикерлер қатысты.

Тренингтің нәтижесінде қатысушылар ақпаратты жеткізу дағдыларын, топпен байланыс және сенімді қарым-қатынас орнату тәсілдерін үйренді. Сонымен қоса, көпшілік алдында сөйлеу стилін игеріп, өзіндік оқыту бағдарламаларын құра алды.

Бұл бастаманың мақсаты – игерген білімін алдағы уақытта аймақтық волонтерлерге бере алатын тренерлерді дайындау.

Оқу аяқталған соң, қатысушылар аймақтардағы волонтерлерді оқыту арқылы өз дағдыларын іс жүзінде қолдану мүмкіндігіне ие болады. Қазақстанның барлық аймағынан 500-ден аса волонтерді оқыту жоспарланған.

Анықтамалық:

«BIRGEMIZ» волонтерлер Республикалық фронт-офисі еліміздің барлық өңіріндегі волонтерлік жобаларды үйлестіреді.

Волонтер жылы аясында Қазақстан үшін салалық волонтерлікті дамытатын 7 басым бағыт анықталған: «Birgemiz: Asyl Mura» (этномәдени мұраларды сақтау), «Birgemiz: Bilim» (білім беру), «Birgemiz: Saýlyq» (денсаулық сақтау), «Birgemiz: Sabaqtastyq» (тәлімгерлік), «Birgemiz: Taza Álem» (экология), «Birgemiz: Úmit» (ТЖ саласы).

Ұлттық волонтерлік желі (ҰВЖ) – азаматтар мен заңды тұлғалардың ерікті бірлестігі. 2010 жылы волонтерлік мәдениетті, волонтерлік бастамалар мен қызметтерді азаматтар, азаматтық қоғам институттары, бизнес сектор мен мемлекеттік құрылым арасында құру, қолдау және дамыту мақсатында құрылды.

Тулегенова Зарина

Басқа материалдар

Back to top button