Зияткерлік ойындар – үздіктерді анықтайтын спорттық жарыс түрі ғана емес, өскелең ұрпақ тәрбиесінде, азаматтардың интеллектуалдық әлеуетін көтеруде маңызы ерекше құрал болып та табылады.
Шымкентте Елбасының «Рухани жаңғыру: Болашаққа бағдар» мақаласы аясында және «Интеллектуалды ұлт – 2020» мемлекеттік идеясын жүзеге асыру мақсатында «Ойлы болсаң, озып көр!» байқауы басталды.
Атамыш жобаның мақсаты жастарды зияткерлікке баулуға бағытталған. Яғни, шахмат, тоғызқұмалақ және дойбы ойындары арқылы жастардың ойлау қабілетін арттырып, саналы ұрпақ қалыптастыру. Сондай-ақ, адамның жеке басының мінез-құлқын қалыптастыру, іздемпаздылыққа, ықпал ету болатын. Тағы бір қуанарлық жайт – енді Шымкент қаласының мектептерінде шахмат өнері пән ретінде енгізіліп, интеллектуалдық ойынның өрісі кеңейетін болды.
Бұл жоба Шымкент қаласында интеллектуалды ұлттың қалыптасуына жол ашатыны сөзсіз. Ғылымда: «Адам ойлау жүйесінің 30-ақ пайызын қолданады. Ал қалғаны жұмыс істету арқылы дамиды» деген қағида бар. Сол себепті жас буынның дұрыс ойлауын дамытуымыз керек. Бұл ойындар адамның ойлау және есте сақтау қабілеттерін арттырады. Адамды байсалды, сабырлы болуға, қажырлықты шыңдауға, бастаған ісіңді соңына дейін жеткізуге үйретеді. Табандылыққа тәрбиелейді, қайсарлыққа баулиды.
«Ойлы болсаң, озып көр!» байқауы жыл соңына дейін жалғасады. Жалпы жүлде қоры – 2,5 млн теңге. Сайыс жас ерекшеліктеріне бөлінген. Олар – оқушылар, ересектер және ардагерлер.
