Асылбек Есенбаев – Президент халықтың әл-ауқатын арттыруға арналған маңызды тапсырма берді
Президент Қасым-Жомарт Кемелұлы Тоқаев Парламент Мәжілісінің отырысында Үкімет алдына халықтың әл-ауқатын арттыру жөнінде маңызды әрі ауқымды міндеттер қойды.
Мемлекет Басшысы Премьер-Министрге халықтың табысын арттыру бағдарламасын әзірлеуді тапсырғанын ерекше атап өткім келеді. Қасым-Жомарт Тоқаев: «Жұмыс нақты əрі əр бір азаматқа бағдарланған болуы керек. Басқарудың əр деңгейінде кедейлікті төмендетудің нақты көрсеткіштерін бекіту қажет. Жұмысқа орналастыруды қажет ететін азаматтардың нақты санын анықтау керек», – деп атап өтті.
Осыған байланысты «Рухани жаңғыру» Қазақстандық қоғамдық даму институтының (ҚҚДИ) 2021 жылдың 20 шілдесінен 2 тамызына дейін жүргізген әлеуметтік зерттеуінен мысал келтіргім келеді. Зерттеу қорытындысы халықтың негізгі бөлігінің борыштық жүктеме мәселесі бар екенін көрсетті. Мәселен, 66,0%-ының несие рәсімдеу тәжірибесі бар, олардың бір бөлігі сауалнама жүргізу кезінде несиелерін өтеген. Олардың 37,0%-ы сауалнама кезінде несиеге төлеп жатқан болса, 7,0%-ы бірнеше несиені қатар төлеп жатқандар болды.
Ауыл тұрғындары арасында жаппай сауалнама жүргізу кезінде несиесі барлар үлесі жоғары (41,4%) болды. Ал қала халқы арасында бұл көрсеткіш біршама төмен (34,1%) екенін байқадық.
Сондай-ақ, бұл ретте қазақстандықтар арасында ақша жинау әдеті мүлде қалыптаспағанына куә болдық. Яғни сауалнамаға қатысушылардың тек 26,0%-ында ғана жинақ немесе депозит болды. Бұл халықтың жинақтауға мүмкіндігі жоқ екендігін көрсетеді.
Мемлекет басшысы жариялаған әлеуметтік және экономикалық шаралардың барлық пакетін іске асыру қысқа мерзімде нәтижелер беретініне сенімдімін.
